القرض الطلابي ومنح Stipendium

99

بعد قبول عدد كبير من الطلاب السوريين بالجامعات الألمانية والغالبية العظمة حققوا شروط القرض الطلابي Bafög ومتل ما الكل بيعرف بعد الانتهاء من القرض الطلابي لازم الشخص يرجع مبلغ من القرض ، بس لحتى الطالب يدرس براحته وما يهتم بالمبلغ الي لازم يرجعو ، اغلب الطلاب بتدور على منحة تدعم الدراسة بحيث الطالب بيحصل على مبلغ شهري اعلى من القرض الطلابي ومانو ملزم الطالب انو يرجع شي بعد انتهاء فترة الدراسة

بهاد الرابط في اسماء اكبر 13 منحة دراسية

طبعاً بموقع كل منحة في وقت تقديم الطلبات والأوقات بتختلف من منحة لمنحة

كل منحة الها شروط معينة بس الأغلبية بيشتركوا بطلب علامات عالية

الحل الأمثل لفرصة تحصيل منحة كتابة رسالة دافع مع سيرة ذاتية مرتبيين والتقديم ع جميع المنح بحيث الفرصة تزيد

تجربة كاملة لاحد الطلاب المقبولين من منحة ابن سينا Avicenna

بعد تقديم الطلب عن طريق الرابط

وتعبأة جميع المعلومات المطلوبة بشكل إلكتروني بيحصل إيميل تأكيد بجميع المعلومات يلي كتبتها وبعدها بيبعتوا المنظمة إيميل لتخبرك متى ممكن يصل التأكيد او الرفض وهي المدة تقريباً بعد شهر ونص من انتهاء تقديم الطلبات.

بس يصل القبول بيطلبوا من الطالب المقبول إرسال إيميل بموافقة القبول ومع الطالب مدة أسبوع ليرسل التأكيد انتبهوا ممكن يصل الإيميل بالبريد الغير مهم

بعد إرسال رسالة التأكيد بيبعتوا المنظمة إيميل بموعد مقابلة اغلب الأحيان بتكون المقابلة بوحدة من المدن الكبيرة والمنظمة بتتحمل تكاليف المواصلات.

المقابلة بتكون مقسمة لقسمين قسم جماعي يعني مجموعة من الطلاب مع بعض تقريباً 12 طالب مع بعض بيعطوهون نص في معلومات عن البيئة والسياسة والاقتصاد والتعليم لازم يشرحوا النص وكل شخص يعطي وجهة نظرو بالموضوع يعني مع/ضد ويشرح السبب  تقريباً المدة 40 دقيقة بس لازم الطالب يحكي قد ما بيقدر

القسم الثاني مقابلة شخصية

بكون في شخصين بيسألو الطالب لحالو اسألة اول شي اسألة شخصية بعدها اسألة سياسية متل ، شو الأخبار يلي يتابعها وشو اخر شي شفتك بالأخبار ومهتم فيه وممكن يسألوا ازا قابلت المستشارة الألمانية شو ممكن تنصحها .

بعدها اسألة دينية متل شو وجهة نظرك عن الإسلام بألمانيا ومن وين بتجيب معلومات عن الإسلام إذا كان عند شي حابب تستفسر عنو وازا صرت متحدث باسم المسلمين بألمانيا شو ممكن تعمل واشياء عامة تانية بس هنن بيسألوا هيك لانهم منظمة إسلامية .

بعدها اسألة عن المنظمة متل ليش اخترتها وشو عم تنتظر منها .

بعدها اسألة عامة متل ليش اخترت الفرع الدراسي يلي عم تدرسو و وين بتشوف نفسك بعد 5 /10 سنوات ، وفي اسألة عم النظمة يلي انت بتشتغل فيها تطوعي لازم تشرحها وتشرح وتشرح شو عملك فيها ، وشو هنن المقالات يلي بتقرأها ، وآخر شي بيسألوا ازا عندك اسألة وازا ما سألوا اسأل انت مشان تبين انك مهتم طبعاً لاتسأل عن الراتب وهل أشياء .

بعد انتهاء المقابلة بيجيك رد بعد تقريباً شهر ونص ازا كان بالقبول لازم تبعت انك قبلت القبول

طبعاً لحد هون ما بتكون بعتت اي شيء ورقي كلشي إلكتروني ، بعد بأسبوعين بيجيك إيميل بالأوراق المطلوبة والطلب يلي لازم تعبي بيكون لازم تعبي معلومات تقريباً من المعلومات يلي بيطلبوها من الطالب مشان القرض الطلابي واوراق تانية بيكون شارحينها .

وبعد إرسالها ما عليك غير انتظار أوراقك يلي بتبين كم راتبك ومتى رح يصل وتكمل دراستك 🙂

بالتوفيق [فريق دوبارة المانيا]

مشاركة
Avatar
دوبارة هي شبكة خدمية، تقوم على فهم مشاكل الأفراد ومتطلباتهم لابتكار أفضل الحلول المناسبة لهم، من خلال منصة الكترونية تشاركية تجمع من لديه المشكلة وبين من يمتلك الحل.