نصائح قيمة لتعلم لغة جديدة 2

0
585

رح نكمل اليوم الجزء التاني من النصائح الهامة بتعلم أيا لغة..

1. اكتشف أنماط اللفظ
كل لغة بيميزها نمط معين من اللفظ بيختمو فيه الكلام او بيستخدمو لمجموعة أحرف مع بعض .. اكتشفه وحفظه

2. كيف تقول (س)
هي أهم وأول جملة لازم تتعلمها، تعلمها بكير واستخدمها كتير

3. إذا ما لقيت حدا لطيف تقدر تمارس لغة معه عليك بالزميل الإلكتروني
في كتير من مواقع تعلم اللغة الي بتيح هالخاصية.. انت بتمارس معه لغتك الأم وهو بيساعدك تمارس معه لغته..وممكن مايكون بدو منك شي كمان.. http://livemocha.com/ أحد المواقع الظريفة بهالخصوص.

4. بس تتعلم كلمة جديدة حاول تعيدها كذا مرة فوراً
لما بيصدفك تعلم كلمة جديدة بموقف حاول فوراً ترجع تستخدما بالجمل التالية كذا مرة، ورجاع عيدا كمان كم مرة بعد شوي، عيد العملية كذا مرة خلال اليوم، صدقني رح تلزق بمخك للأبد.

5. برامج التلفزيون، الأفلام، الصحف والمجلات، مكملات جيدة
جرب تحضر فيلمين بالأسبوع بهاللغة، وتقرا الجريدة يومياً، هالشي رح يساعد انو يخليك دائما بجو اللغة.

6. معظم الأشخاص محبين للمساعدة، سمحلهم يساعدوك!
مثلا إذا كنت بسوبرماركت جرب تطلب المساعدة من حيلا شخص، أشرله عشغلة وسأله شو اسمها؟ اسأله شغلات تانية..معظم الناس ودودين ومحبين للمساعدة، ولا تنسى أنه تعلم اللغات مو للخجولين.
7. مابيمنع اذا في شي عم تنسى اسمه كتير تكتب اسمه ع ورقة وتلزقها عليه

8. المراحل الي رح تمرق فيها
اول شي رح تحكي شوي بس بدون ماتقدر تفهم عالعالم شي.. بعدين رح تقدر تفهم منهم أكتر ماتقدر تحكي.. بعدين رح تصير تقدر تتحدث بس بمجهود عقلي .. بعدين رح تقدر تحكي بدون مجهود عقلي بالوعي تبعك يعني رح تبطل تحتاج ترجم الحكي بعقلك قبل ماتقوله.. وبس توصل لمرحلة تسمع وتحكي بدون ماتفكر وتترجم بمخك رح تكون وصلت لمرحلة انك تقدر تفكر بهي اللغة..وهيك بتكون وصلت لأعلى المراحل!

9. وآخر نصيحة…حاول تخلي الموضوع مرح قدر الإمكان

وهلأ بيبقى تخبرونا انتو من خلال تجاربكم شوفي شغلات تانية ممكن تساعد …

[دوبرجي]