نصائح قيمة لتعلم لغة جديدة 1

1017

عندي شوية نصائح رح تساعدك ع الأكيد بتسريع وتيرة تعلمك لأي لغة جديدة، وتأكد انه اكمالك لهي النصائح رح يسرع اندماجك بالبلد يلي أنت فيه.

1. ساعة محادثة مع شخص متقن للغة يلي بدك تتعلمها، بتعادل 5 ساعات دراسة بالصف أو 10 ساعات دراسة ذاتية.

2. مو المهم تدرس 10 ساعات لغة باليوم، المهم تخليها جزء من حياتك اليومية، وتتعامل معها كل يوم وكل ساعة وكل دقيقة، وهاد بيفسر ليش كل طلاب المدارس وبالرغم من انهم طول فترة سنين الدراسة بيكونو عم يدرسو لغة تانية ومع ذلك مابيتقنوها،لانو بيدرسو ساعات قليلة غير مركزة بأيام متفرقة، تعلم اللغة بيحتاج الكثير من التكرار، والالتزام والاستمرار، وتدخلها بتفاصيل حياتك.

3. ابدأ بالـ 100 كلمة الأكثر شيوعاً، فمن غير المعقول – وانت بأول مشوارك – تبدا تتعلم مصطلحات طبية، سياسية أو حتى علمية، ابدا مثلاً بأسماء الأيام والأشهر وأفراد الأسرة والملابس وأسماء الغرف، وحاول انك تحفظهم وتستخدهم قدر المستطاع، لحتى تتأكد انهم صارو جزء من تراثك اللغوي، ولعلمك فقط الـ 100 كلمة الأكثر شيوعا بأيا لغة، بيشكلو 50% من لغة التواصل البشري.

4. حمّل على موبايلك قاموس للغة يلي بدك تتعلمها، وتأكد انه هالخطوة رح تعمل فرق كبير بحياتك، فبدل ما ضيّع وقتك لتشرح فكرتك خلال موقف معين، ببساطة فيك تترجمها وتحكيها، وهيك بتكون سهلت الأمر ع حالك، وكسبت كلمة جديدة.

5. خليك عم تمارس اللغة بعقلك، اختلق محادثات وهمية وجرب تحكيها بينك وبين حالك، جرب تبدا بإنو توصف شغلك، وليش انت حاليا بهالبلد مثلاً، هالشي رح يخليك بالحقيقة تتمكن من اللغة ومفرداتها وتكون جاهز دائماً لأي موقف.

6. ببداية مشوارك بتعلم أي لغة، رح تحاول تربطها بالعربي، فكل ترجماتك وربط المفردات الخاصة باللغة الجديدة، رح تكون مبنية ع منطق اللغة العربية، وع هالأساس رح تقول شغلات “مضحكة” وغير متناسقة، بس مع هيك بدي ياك تتقبل هالشي، ولاتستحي أبداً، هي مجرد البداية، ولازم تتقبل حالك بهي الفترة برحابة صدر، وخصوصاً بحال حدى سمعك وانتقد الجملة يلي حكيتها، فلازم تكون قد حالك وتتقبل النقد، يلي ح يكون طريقك لتتعلم الصح.

يتبع..

شارك هذا المنشور
دوبارة هي شبكة خدمية، تقوم على فهم مشاكل الأفراد ومتطلباتهم لابتكار أفضل الحلول المناسبة لهم، من خلال منصة الكترونية تشاركية تجمع من لديه المشكلة وبين من يمتلك الحل.