مشروع “ع هدير البوسطة” للقراءة

452

الكتاب هو الرفيق يلي ماممكن يخونك أو يتركك بأصعب أوقاتك وهو الي ممكن ياخدك و يسافر فيك عأماكن كتير بعيدة و يعيشك بدنيا تانية.

مجموعة من الشباب بالتعاون مع دار النمير بدمشق حبو يبلشو بمشروع بسيط و بإمكانيات صغيرة ليخلو كل شخص يقرأ و يحس بمتعة القراءة.

المشروع مبني على فكرة بأنو كل شخص ماعنده مقدرة يشتري كتاب أو رواية مو متوفرة pdf بيبعت رسالة باسم الكتاب ع رسائل الصفحة، وشهريًّا رح يتم اختيار خمس أسامي -ع الأقل- و بعدا بيتم إخبارن بأنو يستلموا الكتب من مكتبة دار النمير بالشام.

مبدئيًّا الفكرة مطروحة لتبدأ بس بدمشق, ومع الأيّام مع دعمكن رح تتوسع للمحافظات السوريّة والبلدان التانية.

كل شخص حابب يساهم بالمشروع، سواء بدعم الصفحة، بدعم الفكرة، أو بتبرعات ماديّة “تمن الكتب” فيه يراسل الصفحة.

للحفاظ على الخصوصيّة, كل شخص رح يبعت رسالة ع الصفحة، وكل شخص رح يتم اختياره ورح يستلم الكتب، رح يضل الموضوع سري، مارح ينعلن اسم أي شخص بالصفحة.

انطلاقة المشروع كلها كانت من منطلق إنساني وأخوي وعفوي لا أكتر ولا أقل، لأن كلنا ولاد بلد واحد وثقافة وحدة وأدب واحد وحلو نتشارك الأدب بالتبرع والتعاون وكل شخص بيطلب كتاب فيه يفيد حدا تاني ويعيرو لصديقو أو حدا مقرّب منّو وهيك الجميع  بيتشارك الأدب بسبيل تاني.

وأهم شي ” لمّا تطلب كتاب، بتكون عم تدعم الفكرة وماتخليها تموت “.

رابط المشروع ع الفيسبوك

شارك هذا المنشور
دوبارة هي شبكة خدمية، تقوم على فهم مشاكل الأفراد ومتطلباتهم لابتكار أفضل الحلول المناسبة لهم، من خلال منصة الكترونية تشاركية تجمع من لديه المشكلة وبين من يمتلك الحل.