فن جبر الخواطر

459

ضمن حديث مع احدى الاصدقاء انفتح الموضوع .. والصراحة صاير في كتير سلبيات منتشرة ع صعيد العلاقة المجتمعية بينا كسوريين بالغربة بشكل أكبر …

ما بدي احكي عن السلبيات وأسبابها … خلينا بالعلاج ويلي هو فن جبر الخواطر!
وحنحصروا بفترة رمضان كمثال كون هلأ رمضان …

بالغربة أولاً: نحنا انتشرنا كسوريين ببلاد العالم كلها وما بظن في بلد فيها سوري هيك لحالو هاجر عليها .. بكل جنسيات العالم بتلاقيهم عم يدورو ع ناس من بلدهم دوارة

الا نحنا … بعرف في ناس تعرضت لمواقف بشعة من ولاد بلدها بس هاد مو يعني نعمم مو يعني نبعد عن الكل ولا حتى بحجة الاندماج … رفضك لعاداتك الجميلة يلي تربيت عليها وعشت فيها هو بصغرك قدام المجتمات يلي انت فيها … ما بقربك الهم …

مو معقول تعايد الناس برمضان ينطلك واحد يقول اخي ما بحب المعايدات أو يصير شيخ ويفتيلك ياها بدعة !! مابتحبها لا تعايد .. لا تبادر .. بس يلي بعايدك جبور بخاطرو وردها باحلى منها .. يعني هو عملك قيمة وعايدك وانت بترد عليه بجفاصة .. الرد الحلو فن ..

مو معقول يكون بنفس المدينة الك رفقات وكليوم تقعد تفطر لحالك, وخصوصي العزابية يعني تخيل قديش بتجبر بخاطرو لما بتعزمو ع الفطور وبتجتمعو .. يا اخي لا تعزمو قلو جيب اكلاتك وتعال .. روحو فطرو سوا برا .. اي شي بس سوا .. جبر الخاطر بالجمعة واحياء عاداتنا لحالها فن …

” مثال صغير انا ساكن لحالي, وعندي جيران مسلمين من غير جنسيات (حتى مو عربية) بس بيعرفوني ساكن لحالي كليوم لما يشوفوني قبل الفطور لازم يعزموني مليون مرة انو ما بصير رمضان وتفطر لحالك .. فتخيل ما احلاه من شعور لما جارك يجبر بخاطرك هيك بينما ابن بلدك ما بتسمع صوتو”

بدل ما تفطر 15 مرة بالمطاعم اختصر مرتين عالاقل وتبرع فيون لاخ سوري ساكن بالخيم او ما معو يفطر خبزة بتزيد رمضانك حلاوة .. جبر الخاطر بالعطاء فن …

بلاها صور الموائد والاكل .. شير بوست لشي حملة او مساعدة او معلومة حتى ممكن تساعد فيها شخص تجبر بخاطر, استخدام النت بشكل مفيد للغير فن …

تكون واقف ع باب بيتك حامل مي وتمر تجبر بخاطر صائم وتفطرو بدال ما يكون راكد ع بيتو ليلحق يبل ريقو, يعني البساطة فن …

تليفون من المغتربين لاهلون ورفقاتهم بسوريا وتجبر خاطرو تسأل عنو ولك حتى بالواتس اب او شي اختراع .. اسمها وسائل تواصل يعني للتواصل .. التواصل الجميل فن …

موضوع تساعد وتفطر صائم وجمعيات وهي الامور تاركها الك, هاد شي انت لازم تحط بصمتك فيه وبفن ع الاقل ما بتحسن تساعد بالمال ساعد بوقتك وخصوصي يلي ساكنين بسوريا أو بدول الجوار لسوريا يلي فيها مخيمات, اتطوع بوقتك مع المنظمات.

وأهم نقطة ما تحسس الطرف التاني انك عم تعمل جميلة معو …
العمل بصمت وابتسامة أهم الاسرار بفن جبر الخواطر.

مالح الك عميل تاغ لرفيقك وخبور بخاطرو .. خليها بينك وبينو .. بس شير البوست عسا مين يكون غافل ويستفيد وتكون سبب بانو حدا جبر خاطر شخص تاني من وراك …

الموضوع بسيط كتير ومابدك مين يعلمك ياه .. الغني والفقير السيء والمنيح كلهم بالنهاية بشر وبيحتاجو كلمة او عمل بسيط جميل منك …

الموضوع كبير وكلكم بتعرفوه, بس حبينا نذكركم بعرف في منكم شغلتو الحياة ونسي ..