رحلة الى كمبوديا

15

قصتي اليوم عن موضوع السفر لكمبوديا والمغامرات هنيك..
كون كمبوديا هي يمكن البلد الوحيد يلي بيستقبلنا كسوريين.. القصة بتبلش انو بتطبع حجز طيارة ذهاب وعودة وحجز اوتيل ولو كانو وهميين وبتروح عالسفارة الكمبودية يلي هيه قريبة كتير من السفارة السورية وممكن تاخد عنوانها من غوغل.. بكل الاحوال بتروح بتقدم اوراقك مع صورتين شخصيات قياس باسبورت و بتعتبي فورم وبتدفع 300 رينغت و بتترك باسبورك لليوم التاني .. اليوم التاني بتعطيهوالوصل وبيعطيك جوازك.. بس مو غلط تشيك عليه وتتأكد انو كلشي فيو صح.
الفيزا عبارة عن ستيكر صلاحيته 3 اشهر.
قبل ما تركب الطيارة ما بتذكر بانو نقطة بيعطوك اوراق لتعبيهن وتعطيهن للطرف الكمبودي، فيهن معلوماتك ومين نازل وشو رقم موبايلك ومن هالقصص.

بتركب هالطيارة وبتنزل بكمبوديا وبس تنزل من الطيارة الممر بيتفرع لطرفين طرف مشان الفيزا تحصل عليها اذا ما كنت اخدها مسبقا من ماليزيا و الطرف التاني بياخدك على قاعة الدخول.. احتمال يجيك ضابط ختيار بيعرج ومعباية بدلتو نياشين واوسمو.. هاد لما استلمني دفعني 30 دولار -الله لا يسامحو فيهن – بعد ما شاف اديش معي دولار ، لازم يكون معك عالاقل 500 دولار ، كان معي رفيقي نفد وما دفع للضابط متلي.. بياخد ضابط جوازك وبيسألك انت ليش هون وهيك اسئلة وبعدين بيطجلك ختم شهر وبيقلك عطيتك شهر.. انت قلو اذا سألك قعدتي هون بس لاسبوعين بظن وقتها بترتاح نفسيتو.

وسيلة التنقل المنتشرة بكمبوديا هيه التوك توك او الموتور يلي بيجر عرباية.. وسيلة بتضحك وركبتها ممتعة.. من المطار للفندق لطش مني 9 دولار.. بس تنقلاتي بقلب المدينة كانت بين 3 و 4 دولار.
الجو فيها كان حلو و الهوايات احلى من ماليزيا، بس للأسف مافيها كتير خيارات للاكل.. مافي غير kfc بقدم اكل حلال وحاطط شعار حلال بمول اسمو Aeon وهو المول الوحيد يلي شفتو، في كمان بالطابق التالت مطعم مشكل كمان في بالمنيو تبعو صفحتين فيهن اكل حلال.

في كمان خيار تاني هو dominos pizza بس الطلب عن طريق الموقع.. بظن الخطوات سهلة وبتشرح حالها.. فوت عالcutomize مشان تشيل لحم الخنزير ham , pork, pacon, وبعد ما تطلبها بشي نص ساعة بتكون عندك والحساب كاش.
في مطعم اردني وحيد اسمو petra ناح السفارات بظن.. بس اسعارو كمان غالية واكلو لا بأس.
البلد حلوة وعم تتعمر.. ويمكن بعد فترة تصير متل ماليزيا، الشعب طيب جدا ولطيف. بس انكليزيتو على قدها.
البلد فيها معالم سياحية متل السوق الروسي والسوق المركزي والقصر الملكي وال killing field. بس نحنا كسوريين منستغلي شوي لانو المعاملة بتكون بالدولار.
اذا حبيت تشتري هدايا او تذكارات بنصحك تروح على السوق المركزي او الروسي ولا تنسى تفاصلهن لانهن بيتفاصلو كتير.

خلي مصرياتك دولار ولا تقلبهن كمبودي لانو الدولار الواحد يعادل 4100 ريال كمبودي.
دير بالك على اغراضك وانت بالتوك توك لانو ممكن حدا يجي بسرعة ويلطشهن.
اخر شي ونصيحة كتير ضرورية .. جيب معك اكل قد ما بتقدر .. الاكل هنيك غالي نسبيا بالنسبة لماليزيا كونو كمان الدفع بالدولار..اي اذا كتير خايف من قصة الايميغريشن بال klia 2 فينك تطلع عن طريق klia 1 عن طريق خطوط malindo و malaysian airlines.. صح هنن اغلى من airasia بس اضمن.
بالتوفيق والسلامة انشالله

[هذه المقالة تمت إضافتها عبر مدونات دوبارة وتعكس رأي الكاتب فقط]