دخول السوريين للأردن

11644

من حوالي الست سنين كان في شي حلو بين سوريا والأردن يلي هو الدخول والخروج على الجواز بدون تأشيرات مسبقة, بسبب الأزمة السورية التدفق السوري زاد بشكل كبير جداً وكان بمفهوم الحكومة الأردنية بحاجة لتنظيم وللأسف بعد 2013 ايّ سوري ما بيقدر يدخل الأردن بجواز فقط, صار في ضوابط كتير وصار في صعوبة نوعاً ما بالوصول خصوصاً مافي وضوح كامل بالنسبة للقوانين الموضوعة.


اذا كنت برا الأردن فيك تدخل الأردن بالشروط التالية :

1-عندك إقامة خليجية بأيّ دولة من دول الخليج العربي (مافي حاجة  لحدا يقدملك موافقات من الأردن)
2-سجلت بجامعة وأخدت موافقة أمنية من وزارة الداخلية انك طالب وبدك تجي تدرس بالأردن
3- طلب الاستقدام يلي ممكن حدا يقدملك ياه من داخل الاردن عن طريق وزارة الداخلية

طلب الاستقدام : طلب بيتقدم من وزارة الداخلية ممكن لأي شخص يقدملك ياه وكل ما دعمت طلبك اكتر زادت احتمالية الموافقة مثلا (استقدام للعلاج), نتيجة الطلب بتطلع بعد 15 الى 20 يوم وفي حال القبول ممكن ينعمل معك مقابلة بسيطة بمنطقة الجندويل والنتيجة النهائية من بعد المقابلة ب 15 يوم تقريباً, المستثمرين بفئاتهم ممكن يقدمو طلب من دائرة الاستثمار بالدوار الخامس بشرط تحقق شروط الاستثمار وقت تقديم الطلب (ممكن تتغير القوانين بين الحين والآخر) كل ما ارتفعت فئة الاستثمار  بزيد دعم الطلب, الاستقدام للقرابة بالدرجة الأولى (أب -ام -ابن)هو أقوى شي بكل حالات الاستقدام.طلبك بالنهاية ممكن تدعمو بأيّ شي (عقد عمل-اثبات طالب-ملكية منزل..ألخ).

من داخل الأردن بدي اطلع لبلد تاني وارجع (خروج و عودة) :
موافقة الخروج والعودة من وزارة الداخلية هيه حصنك لتروح وترجع بالسلامة بدون اشكالات عالحدود, المستثمر يعفى من الموافقة وأيا شخص غير المستثمر او ما عندو اقامة خليجية بحاجة هالموافقة ليتجنب ايّ مشكلة ,الطالب ويلي عندو تصريح عمل بحاجة ايضا لموافقة حتى لو بدو يطلع عمرة, طبعاً فرصتهم أقوى مشان ياخد الموافقة, أما اذا كان ما عندك شي بالأردن أكيد فيك تقدم طلب وفي فرصة مو قليلة تاخد الموافقة,

اسئلة شائعة عند السوريين:
بقدر قدم طلب من الطلبات السابقة اذا ما عندي شي بالأردن ؟
أكيد بتقدر , لكن بتختلف الفرصة من شخص لآخر
-اخدت فيزة عمرة ومكتب العمرة حكالي بقدر ارجع بدون موافقة ,طلّع موافقة خروج وعودة ؟
موافقة الخروج والعودة هيه الشي الوحيد لضمان رجعتك
– ممكن يرجعو الناس يلي اخدت موافقات خروج وعودة؟
القوانين بتقول لا ويغلب على الأمر دخول الجميع

ملاحظة:
القوانين يلي كتبنا عنها لتاريخ كتابة المقال ممكن تتغير بين الفترة والتانية وحنحاول نضل نعملها تحديث.

[فريق دوبارة الاردن]

شارك هذا المنشور
دوبارة هي شبكة خدمية، تقوم على فهم مشاكل الأفراد ومتطلباتهم لابتكار أفضل الحلول المناسبة لهم، من خلال منصة الكترونية تشاركية تجمع من لديه المشكلة وبين من يمتلك الحل.