تعلم لغتين في وقت واحد!

0
145

وردتنا أسئلة كتيرة مؤخراً عن وضع الي عم يتعلم أكتر من لغة بوقت واحد، إذا صح أو خطأ وشوفي نصائح ممكن يتبعها
بعض الخبيرين بمجال تعلم اللغات بيقولو:
لحتى يكون عندك رغبة تتعلم لغتين بنفس الوقت لابد أنه يكون بشخصيتك في مسحة مازوشية (حب تعذيب الذات)، يا أما حابب تدور ع معضلة تحط حالك فيها 
لكن بنفس الوقت الموضوع سلاح ذو حدين، كونه بدخولك هالتحدي والنجاح فيه، رح تكون جائزتك بالإضافة لـ (تمرين قدرتك على التفكير بشكل غير مسبوق وزيادة سرعة بديهتك وتحفيز قدراتك العقلية وتحضيرك لتعلم لغات أخرى بالمستقبل بمنتهى السهولة) .. تعلم لغتين جداد!
طبعا تعلم اللغات مهارة قابلة للتطوير، ومافي شي أكتر من تعلم لغتين بنفس الوقت ممكن يطور هالمهارة!

رح نذكرلكم هون عدة نصائح بتساعدك لتجاوز هالتحدي، بس بالاول عنا ملاحظة مهمة قبل كل شي..

أهم شيء بعملية تعلم أي لغة هو تشكيل ما يسمى النواة، والي بتتكون من (بنية اللغة، طريقة اللفظ، أهم المفردات، صور من الحياة اليومية، وأهم الأزمنة)، لذلك حاول قدر الإمكان إنك ماتشكل نواتين بوقت واحد، بإمكانك تشكيل نواة اللغة الأولى ومن ثم الانتقال لتعلم اللغة التالية مع تنقية وتطوير اللغة الأولى بنفس الوقت، وهيك بتكون فعلياً عم تتعلم لغتين سوا.

وهلأ منجي لنصائح تعلم لغتين بنفس الوقت:

1- اختار لغتين مختلفتين تماماً
وهي أهم قاعدة، إياك تفكر تتعلم لغتين قراب من بعض بنفس الوقت إلا إذا كانت حياتك متوقفة عهالموضوع!
اللغات المتشابهة و خصوصي بأول فترة من تعلمها ممكن تختلط براسك، لذلك إنك تتعلم إسباني وإيطالي، أو هولندي وألماني، أو برتغالي وروماني بنفس الوقت فكرة مو جيدة أبداً، في حين تعلم الإسباني والصيني سوا مثلاً فكرة ممتازة!

2- حاول تختار لغة صعبة عليك وتانية أسهل نسبياً، أو فينا نقول وحدة مألوفة والتاني أقل إلفة.

3- قسم وقتك بين اللغتين بشكل غير متساوي!
لازم تكون مخصص وقت وجهد للغة أكتر من لغة، بحيث من 70 لـ80 % للغة الأولى، ومن20لـ30% للتانية، إما على أساس الأولوية أو على أساس الصعوبة حدد هالشي، وهاد قرارك بهالخصوص.

4- ادرس كلتا اللغتين “يومياً”
إذا بتخصص أيام أو أسابيع أو لنقل شهر لهي وشهر لهي، رح تكون متل الي عم يمشي خطوة لقدام وخطوة لورا، وبالآخر رح تلاقي حالك مكانك.

5- لمساعدتك على التقليل من عامل الارتباك، خصص هوية لكل لغة، من إحدى الطرق، إنك تخصص لون معين لكل لغة تستخدمو للدفاتر والأوراق ..الخ، وفرضاً كنت عم تتعلم إسباني وصيني، ذكر حالك كل يوم
Spanish is red,
Chinese is blue,
I will learn both,
If it’s the last thing I do!

6- مارس اللغتين بنفس الوقت من خلال الترجمة بيناتهم!
هاد التمرين بيساعدك بالإضافة لممارسة اللغتين، على التفكير بهي اللغات بدون الرجوع للغتك الام وربطهم فيها، وهادا شي كتير مهم! التمرين صعب، بس ممتع جدا!

7- جرب تخلط اوراقك تبع اللغتين بقلب بعض وتدرس اللغتين بنفس الوقت!
رح تقلي مو قلنا سابقا أنه لازم نفصل بين اللغتين ومانخلط بينهم لنقلل من عامل الارتباك.؟
تمام.. الي قلنا هو لازم تختار لغتين بعاد عن بعض حتى ماتخلط بينهم، أما هادا التمرين رح يعطيك المرونة العقلية الضرورية والي بتلزمك ك متعلم للغتين بوقت واحد، بالإضافة لمساعدتك على تثبيت كل لغة بمكانها بشكل قوي.

8- جرب تتعلم عن نفس المواضيع باللغتين بنفس الوقت
طريقة الها تأثير كبير على ترسيخ اللغتين بدماغك، وتحفيز ذاكرتك للاحتفاظ بالكلمات الي عم تذكرها بكلتا اللغتين.

وبالنهاية، إذا نجحت بهالتحدي الصعب رح تلاقي حالك بنهايته قادر على إنجاز كتير شغلات ماكنت تتوقع حالك إنك بتقدر تعملها من قبل 

شارك هذا المنشور
دوبارة هي شبكة خدمية، تقوم على فهم مشاكل الأفراد ومتطلباتهم لابتكار أفضل الحلول المناسبة لهم، من خلال منصة الكترونية تشاركية تجمع من لديه المشكلة وبين من يمتلك الحل.