أصول وأدبيات التقدم لشاغر وظيفي

0
31

اليوم بدي احكي عن موضوع مهم كتيير بخصوص #فرص_العمل ..

بعد اكتر من شكوى من بعض الشركات يلي نشرت عنا فرص عمل أو حتى الفرص يلي نشرناها كرمال التزكية للتقدم على بعض الشواغر .. حابب احكي بنقاط اساسية ومهمة

– أول نقطة اقرا فرصة العمل بشكل واضح واكتر من مرة .. مو بالضرورة اذا العنوان تبع الشاغر الوظيفي هو شي بتعرفو يعني المتطلبات لهي الفرصة هي امور عندك ياها وقادر تخدمهم فيها ..

– هي الفرصة هية محددة ببلد معين ؟ او منطقة معينة ؟ لا تقدم ولا تقول لحالك بركي ما لقو بهل المدينة بياخدوني انا .. لو ما لقوا بيرجعو بينشرو اعلان تاني لا تخاف ..

– ما بصير انت مهندس زراعي مثلاً تقدم على فرصة عمل لمبيعات (بمجال تخصصي) وانت بحياتك ما اشتغلت بالمبيعات .. قدم ضمن مجالك وركز جهدك بهل الشي ..
(الاستثناء هون ممكن يكون للخريجين الجدد يقدمو ع شاغر مطلوب فيه خبرة بس بحاول يعوضها بتوضيح علاماتو العالية .. مشروع اشتغل عليه الخ ..)

– لما شركة عندها اكتر من شاغر ما بصير تقدم عليهم كلهم (مالك سوبر مان) مو كل الفرص هية لخبرات متشابهة .. انتبه انو اذا قدمت ع اكتر من شاغر للشركة يكونو كلهم ضمن مجال خبرتك ودراستك ..

– لما عم تبعت ايميل فيو السيفي (او السيرة الذاتية) تبعك ما بصير ولا بشكل من الأشكال تبعت الايميل فاضي بس فيو الفايل .. انو صبح او مسي ع الجماعة !! .. هي شغلة بسيطة برأيك بس بتعكس مدى مهنيتك واحترافيتك بالتعامل .. بلش الايميل بشكل واضح ووضح الفرصة يلي انت متقدم الها ولو بالعنوان .. الشركة غالبا عندها اكتر من شاغر وظيفي وموظف الموارد البشرية لما يشوف ايميل فاضي عنوانو (My C.V) ثق تماما مالح يعذب حالو يفتحو لانو واصلو مليون ايميل مالح يضيع وقت ليشوف انت ع اي شاغر مقدم ..

– ما بصير تتخاطب ضمن الايميل بشكل ودي زيادة ولا باللغة العامية او اختصارات بالانكليزية متل (u بدال you)

– السيرة الذاتية لازم تكون ضمن ملف مرفق ما بصير تكون تنسخها وتحطها ضمن الايميل

– ممكن نص رسالة الايميل هو (Cover Letter) لحتى تحاول تشد موظف الموارد البشرية يفتح السيفي تبعك وهو عم يقلب .. (ما بتعرف شو يعني Cover Letter غوغلها او نطرنا)

– بالنسبة للسيرة الذاتية مافي داعي يلي يفتحها يشوف مكتوب CV بخط حجمو 72 .. اكيد هاد يلي لح يفتحو سيفي مو ليستة الخضرة يلي بدو يجيبها ..

– لما الفرصة بتكون محطوطة باللغة الانكليزية فصاحب العمل (خصوصي اذا لشركة عربية) بكون قاصد هالشي ليشوف اساسيات التواصل عندك باللغة الانكليزية .. مابصير تبعتلو سيرتك الذاتية والايميل بالعربي ..

– شواغر مصممي الغرافيك والموشن غرافيك ومبرمجي الويب وبيلحقون التصميم الداخلي وهندسة العمارة (متجاكر منكم) كيف ممكن تتقدم لفرصة عمل بسيفي متلك متل غيرك !! انتو بالذات ما بهم كتير وين اشتغلتو .. المهم كيف شغلكم وشو الجودة يلي عندكم ..
ما بصير تبعت سيرتك الذاتية بدون (Portfolio) تورجي فيه شغلك شو بدو بصورتك ولا تولدك وهواياتك وباقي الامور .. اكيد مهمة بس بنسبة ٢٠٪ والباقي بدها تروح لشي مشتغلو من قبل يشوفو

جماعة الغرافيك والموشن ما بصير ما يكون عندك حساب عالبيهانس او موقع خاص فيك تحط شغلك فيه لتعطي حالك كريديت اكتر عن شغلك .. اصلن مو مقبلو تكون سيفيتك ملف وورد عادي لازم تعطي لمسة ابداعية فيه ..

– بالنسبة لشواغر التزكية .. بكل المنشورات يلي حطيناها كان البوست واضح .. اختار شاغر وظيفي من الموقع بوافق خبراتك .. مو تعبي الفورم وتحط شاغر وظيفي انت حابب تشتغلو (شو يخترعولك وظيفة ع كيفك يعني !!) بوست التزكية هو عبارة عم شخص ضمن شركة بتعطي الافضلية للطلبات يلي بتجي عبر موظفينها على الطلبات يلي بتجيها بشكل مباشر
لما انت ما بتلتزم بموضوع التقدم على فرصة انت قادر تشتغل فيها ولا عندك الخبرة المطلوبة فيها فانت عم تسبب احراج للشخص يلي حابب يساعدك امام الشركة تبعو وتأثر ع مصداقيتو انو هو عم يرشح ناس كفؤ .. وهيك عم تضيع عليك وعليه وع ناس مقدمة الفرصة ..

اكيد لاحقاً منشرح كيف بتعمل بتعمل سيرة ذاتية ومن هي الامور .. بس عم نوضح حاليا أداب التقدم على شاغر وظيفي لعدة اسباب ..

اهمها وهاد لازم انت تلتزم فيه لانها مصلحتك اولا .. لما انت بتتقدم لشاغر انت ما بتلبي شروطو الاساسية من حيث المكان او الخبرات عم تقلل من قيمة اسمك بسوق العمل

حتقول اي لا ما بأثر ثق تماما بأثر .. لما انا بكون موظف موارد بشرية بشوف مهندس مقدم ع وظيفة محاسبة ولا غيرو لح يعلق بمخي بشكل او اخر .. لما ترجع الشركة تطرح فرصة لمهندس وانت تقدم عندك نسبة كبيرة يتذكرك (هاد اذا ما كان التقدم عبر حساب مسبق ع الموقع وينعمل x على اسمك من اول فرصة خبصت فيها) اول كلمة بقولها موظف الموارد البشرية هاد شخص عم يشلف التقديم وماعندو مهنية .. مالح يوظفك ..

ونفس الشي لما بتقدم ع اكتر من شاغر لنفس الشركة ..

ركز جهدك ضمن مجال عملك وخبراتك لا تشتت نفسي بالتقدم ع اي شاغر وظيفي (بعرف الشغل مو عيب بس مو هيك)

الحكي يلي فوق يمكن كتير يعترض فيو ع اللهجة .. انا مالي هون بمكان لاستعرض مهاراتي الكتابية والالقائية عليكم .. هالبوست اسعافي سريع نابع من محبة وخوف عليكم من التخبيص يلي عم يصير ..

بعرف شعور لما تكون قاعد بالبيت ومحروق ع فرصة عمل .. بس التقديم العشوائي ما بجبلك نتيجة وبالعكس بأثر عليك بشكل سلبي غالباً .. وبشكل يمكن ما تتوقعو ..

بس البحث عن فرصة عمل هو وظيفة وخبرة بحد ذاتها ..
(مرة صديق خبرني عم شب خريج جديد وبحياتو ما اشتغل سيفيتو لا تتعدى سطرين المفروض .. حاطط بخبرات العمل انو عندو خبرة عمل وهو “باحث عم عمل” وحاطط الخبرات يلي اكتسبها من هالشي وعدد الساعات يلي كان يقضيها وعامل من السيرة فلم .. تم قبولو مع انو كان الشاغر لوظيفة بالـ Operations وبتتطلب خبرة .. بس ابداعو خدمو وعوضو)

البوست طويل بس اذا وصلت لهون معناها انت شخص ممتاز عندك الارادة لتتعلم من اخطائك وثق تماما اذا التزمت فيها وقريت عن الموضوع بشكل موسع لح تحصل ع مرادك ..